Breaking News

Poem By Dr. Satya Pal Anand Ji

“بچپن سے بڑھاپے تک پرواز تھی سیدھی ہی” کے مضمون کو ابھارتی ہوئی ایک اور نظم دیکھیں۔
طفلِ سِن رسیدہ۔ ستیہ پال آنند
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سو برس کا میں کب تھا، منشی ِ وقت؟

کب نہیں تھے؟ ذرا بتاؤ تو
تم یقیناً کہو گے، بچپن میں
کھیلنے کودنے میں وقت کٹا
جب شباب آیا تو ؟…کہو، ہاں کہو
کیا برومند، شیر مست ہوئے؟
کیا جفا کش تھے؟ بے جگر؟ کرّار؟

آمرِوقت کوکوئی چیلنج؟
سرکشی تختِ مستبد کے خلاف؟
کیا رہے یار باش لوگوں کی
صحبتِ ناؤ نوش میں مدہوش؟

جی نہیں، ایسی کوئی بات نہیں
تم رہے بند کتب خانوں میں
وہ کتابیں بھی چاٹ لیں تم نے
جن کو دیمک نے بد مزہ سمجھا
اس جوانی میں تم رہے مصروف
(جس میں سب لوگ عیش کرتے ہیں)
منطقی پخت و پز کی کاوش میں
لفظ بینی کی خشک عادت نے
موٹے چشمے سے ڈھانپ دیں آنکھیں

تم نے سیکھے عجب ذہانت سے
ُاُتر میمانسا، سمکھیا، یوگ
نیائے، ویدانت اور گیتا گیان
فکر فی نفسہ ، ارتسام و خیال
عینیت، مادیت، ورائے وجود
صوفیانہ مراقبہ، عرفان ۔ ۔ ۔ ۔

……یہ کہولت زدہ بزرگی کے
گرد آلود فلسفے ہیں، جنہیں
اپنی نو خاستہ جوانی میں
تم نے سرمیں انڈیل کر سوچا
اب کلیسا، کلس، حرم ،مینار
جامعات اور ان کا بحرِ علوم
میری جاگیر ہیں ، مری املاک
میں ہوں ذی علم، جیدِ عالم

زیست کا نیم پختہ آدھا گیان
کلمتہ الحق سمجھ لیا تم نے
اور اک جست میں لڑکپن سے
ہو گئے پیر زال، شیخ البیت

منشیِ وقت نے کہا ….دیکھو
تم نے حّدِ بلوغ سے پہلے
اپنی بے رِ یش کم سنی کے فقط
بیس برسوں میں جی لیا صد سال
اور اب طفلِ سِن رسیدہ ہو
.
.۱۹۸۵ء میں تحریر کردہ ، بحر خفیف میں رن آن لائنز کے التزام سے تحریر کردہ ایک سو نظموں کے سلسلے سے مشتق

About meharafroz

Check Also

Short Story By Hamid Siraj

Leave a Reply

Your email address will not be published. Required fields are marked *